kuchh sher faqat unako sunaane ke liye hain

ash-aar mere yuun to zamaane ke liye hain
kuchh sher faqat unako sunaane ke liye hain

ab ye bhii nahin thik ki har dard mita dein
kuch dard kaleje se lagaane ke liye hain

aankhon mein jo bhar loge to kaanton se chubhenge
ye khvaab to palakon pe sajaane ke liye hain

dekhuun tere haathon ko to lagata hai tere haath
mandir mein faqat deep jalaane ke liye hain

socho to badi cheez hai tahaziib badan ki
varanaa to badan aag bujhaane ke liye hain

ye ilm ka sauda ye risaale ye kitaabein
ik shakhs kii yaadon ko bhulaane ke liye hain

                                                                                  -Jan Nisaar Akhtar